Skulebygget på 1800 m2 (fordelt på 1626 m2 i 1. etasje og 174 m2 i underetasjen) består av seks fløyar som er bundne saman av eit fellesareal. I nord er nybygget hekta på gangen til ungdomsskulen, Auditoriet og biblioteket. Her kjem også hovudinngangen; mellom nytt og gammalt bygg.
Det komplekse bygget har fleire inngangar. Me gjekk inn i sørvest, der mellomtrinnet (5.-7. kl.) skal halda til. Her kjem også trapper til underetasjen, med avsett plass for framtidig heis.
Oversiktsteikning, 1. etasje.
Haaland Thuestad/Jardar Havikbotn
Staseleg
Forbi trapperommet og ut i fellesarealet fekk me personalavdelinga på høgre side, fløyen til småtrinnet (1.-4. kl.)/SFO rett fram og kulturskuleavdelinga på venstre side. Bak denne kjem naturfagrommet. I småtrinn-fløyen er det også ei rømningstrapp frå austsida av tilfluktsrommet, med dør ut til det fri.
Det er lett å legga merke til taket i fellesarealet, der laminerte dragarar blir synlege. Her skal også byggast ei kunnskapstrapp rundt ei tresøyle.
Nordover forbi dei støypte øvingsromma i musikkavdelinga, fekk me på venstre side fløyen til skulekjøkken/kantine med kunst og handverk bak. Til høgre administrasjonen.
Nostalgi
Me tok ein tur ned i kjellaren, der det gamle bomberommet skapte nostalgi for ordføraren og underteikna. Kjensla av å vera på veg opp i gymsalen då me gjekk i gangane der nede, kom snikande eit augeblikk. Men så havna me ut i trapperommet i mellomtrinn-fløyen, og vidare til dei nye tekniske romma; ventilasjonsrom, vaktmeisterrom, reinhaldsrom og it-rom.
Prosjektleiar Svein Ersland fortel av utandørsarbeida skal starta i august. I oktober er skulebygget ferdig og klart for laust inventar og utstyr, og i desember er det klart til innflytting. Arbeida er i rute.
Me takkar for ei flott omvising og gler oss til neste!
Her kan du sjå bilde (med tekstar) frå runden (klikk/trykk på bilda viss du vil ha dei større):