Fire prisar til ungdomsskulen!

Bokn skule gjorde det svært bra då dei for første gong var med i Fylkesmesterskapet for elevbedrifter 2024, som blei arrangert i Quality Hotel Maritim i Haugesund 15. april.

Bilde av "Innsats for andre"-gruppa, som både Vedkongane og Hjerterom er ein del av. - Klikk for stort bileteInnsats for andre-gruppa, som inkluderer både Hjerterom og Vedkongane. Framme fv.: Aron Strøm, Sondre Oliversen, Tobias Hatlem, Ådne Norekvål, Magne R. Lund, Noah Hesthammer, William Kro, Kaspian Sæbø, Veslemøy Våga, Line Øvrebø. Bak fv.: Birte Skjold (lærar), Jarl Kro, Sanne Øvrebø, Torstein Johannessen, Ove B. Christiansen, Lars Erik Øvrebø, Truls Foss, Andreas G. Alvestad, Ask Vågshaug, Eskil Bryningsland, Lovise R. Lund, Hannah R. Lund, Emilie Danielsen (lærar). Emilia Ufnal og Helle Faye var ikkje til stades då bildet blei tatt. Jardar Havikbotn

Bokn stilte med to stands; elevbedriftene (EB) Vedkongane (3 elevar) og Hjerterom (23 elevar)  - saman med 48 EB frå ni andre ungdomsskular frå Haugesund, Karmøy, Tysvær, Vindafjord og Sveio.

Salen var fylt med liv frå 200 entusiastiske elevar, og saman med lærarar, jury og publikum fekk dei oppleva mykje kreativitet og brei variasjon i forretningsidear.

Ordførar Egil Våge var til stades på arrangementet på Maritim, og gler seg stort over at Bokn skule gjorde det så bra.
-Eg snakka med representantar i dommarpanelet og dei var imponerte over kreativiteten blant ungdommane, seier han.

Rektor Wenche Havikbotn er stolt over at litle Bokn gjer det så godt i denne samanhengen, og at elevar og lærarar i løpet av dei to siste skuleåra har jobba mykje for å få dette til. 
-Spesielt kjekt er det at Bokn utmerker seg med at me også har ein elevbedrift som gir alle inntektene til gode formål, slår ho fast.

Beste elevbedrift

Vedkongane EB (Ove B. Christiansen, Truls Foss og William Kro) fekk 2. plass av 50 EB, og har god grunn til å vera svært stolte! 

Juryen si grunngjeving

Bedrifta har eit enkelt produkt, tener pengar og har ein god forretningsmodell. Dei står fram som eit motivert team som er svært produktive, har god omsetning og høg forteneste. Dei har i tillegg eit godt nettverk rundt seg.

Storbedrift

Valfaggruppa Innsats for andre, som har eit sosialt fokus og som i fleire år mellom anna har vore med og samla inn pengar til TV-aksjonen, har stifta Hjerterom EB. Dei er 23 elevar og har eige styre.

Det var nok fleire på mesterskapet som la merke til at Hjerterom tok med seg heim heile tre prisar:

Beste tjeneste

1. plass: Hjerterom EB, Bokn skule, Bokn

Juryen si grunngjeving

Bedrifta viser til konkrete prosjekt med gode resultat. Dei har solid gjennomføringssevne, dei re-investerer overskot konkret og dei utnyttar ressursar internt på ein god måte.


Beste utstilling/stand

2. plass: Hjerterom EB, Bokn skule, Bokn

Juryen si grunngjeving

Bedrifta har levert ein levande stand. Dei legg vekt på estetisk ved bruk av med naturlege element.


Beste sosiale entreprenør - i samarbeid med Samfunnssentralen

3. plass: Hjerterom EB, Bokn skule, Bokn

Juryen si grunngjeving

Elevbedrifta driv med sal av både matvarer og andre produkt. Inntektene skal brukast til å avhjelpa fattigdom i ein internasjonal samanheng. Bedrifta består av heile klassen. Første overskot har gått til skuleuniformar på ein skule i Tanzania.

 

Ein liten prat med styremedlemmer i Hjerterom

Styreleiar Magne R. Lund, nestleiar Truls Foss, kjøkkensjef Line Øvrebø og produksjonsansvarleg Noah Hesthammer fortel at dei er ekstra glade og stolte over at Hjerterom fekk så mange prisar.

- Me er veldig motiverte for vidare arbeid, seier Line.

Magne har ein liten teori om kvifor Hjerterom forsynte seg så godt av premiebordet:
- Me er ei bedrift som brukar alle pengane og innteningane på gode formål, seier han. 

Gratulerer med prisane!

Bilde av Vedkongane: fv. William Kro, Ove B. Christiansen og Truls Foss. - Klikk for stort bileteVedkongane: fv. William Kro, Ove B. Christiansen og Truls Foss. Jardar Havikbotn

 

 

 

 

 

 

 


 

Ein liten prat med Vedkongane

Niandeklassingane Ove B. Christiansen, Truls Foss og William Kro står bak EB Vedkongane, som har halde på i rundt 1,5 år. Dei sel opptenningsved i buntar.

-Idéen fekk me då me hjelpte barneskulen med å saga ned tre aust før skulen. Nå får me litt ved frå bønder som har skoga, seier Truls.

Ove fortel at dei held til hjå mormora hans; Signe Berge. 
-Me set stor pris på at me får vera der, seier han.

William opplyser om at det berre tar fem minutt å laga ein bunt med opptenningsved. Dei brukar vedkløyvar og -hammar.
-Me har godt verktøy, skyt Ove inn.

Dei er veldig glade for den inspirerande prisen dei fekk i fylkesmesterskapet. Premien var 1 000 kr. Truls, som er rekneskapsførar, fortel at det dei tener brukar dei til nytt utstyr, eller fordeler seg imellom.
-Me har heller ingen utgifter, seier han lurt.

Har vedkongane nye planar?
-Me får sjå, kjem det frå Ove. Tennbrikettar hadde vore kult å prøvd seg på.

Dei er usikre om dei kan halda fram med bedrifta når dei begynner på vidaregåande skule. 
-Det vil visa seg kva me får tid til - me tar det som det kjem, avsluttar William.

Gratulerer med prisen!

Fleire foto frå arrangementet:

Publisert av Jardar Havikbotn
Publisert 18.04.2024 10.37